ദില്ലി: ഇന്ത്യന് റെയില്വേയുടെ ഭക്ഷണശാലകളില് നിന്ന് മലയാളികളുടെ പ്രിയ ഭക്ഷണങ്ങള് ഒഴിവാക്കിയ വിവാദ തീരുമാനം പിന്വലിച്ചു. മെനുവില് കേരള വിഭവങ്ങള് എല്ലാം ഉള്പ്പെടുത്തിയതായി റെയില്വേ അധികൃതര് അറിയിച്ചതായി ഹൈബി ഈഡന് എംപി ഫേസ്ബുക്കില് കുറിച്ചു. കേരളത്തിലെ സ്റ്റേഷനുകളില് ഏറ്റവും കൂടുതല് വിറ്റ് പോന്നിരുന്ന, മലയാളിയുടെ ഭക്ഷണ ശീലത്തില് പ്രധാനഭാഗമായ അപ്പം, മുട്ടക്കറി, പൊറോട്ട, ദോശ, ചപ്പാത്തി, പുട്ട്, കടല എന്നിവയൊന്നും നേരത്തെ പുതുക്കിയ മെനുവില് ഇല്ലായിരുന്നു.
റെയില്വേ വെജിറ്റേറിയന് റിഫ്രഷ്മെന്റ് റൂമുകളിലെയും (വിആര്ആര്), റസ്റ്ററന്റുകളിലെയും ഭക്ഷണ നിരക്ക് അടുത്തിടെ കുത്തനെ കൂട്ടിയിരുന്നു. ഇതിന് പിന്നാലെയാണ് പുതിയ പരിഷ്കരണവും വന്നത്. ഉത്തരേന്ത്യന് ഭക്ഷണശീലം മലയാളികളില് അടിച്ചേല്പ്പിക്കുന്നതിനെതിരെ വലിയ പ്രതിഷേധം ഉയര്ന്നിരുന്നു. ഇതേത്തുടര്ന്നാണ് തീരുമാനം റെയില്വേ മാറ്റിയത്.
അതേസമയം, ട്രെയിനുകളിലെ ഭക്ഷണ നിരക്ക് കൂട്ടിയതിന് പിന്നാലെ സ്റ്റേഷനുകളിലെ സ്റ്റാളുകളിലെ വില നിരക്കുകളും തോന്നിയപോലെ കൂട്ടിയിരിക്കുകയാണ്. ഊണിന്റെ വില 35 രൂപയില് നിന്ന് 70 രൂപയാക്കി കുത്തനെ വര്ധിപ്പിച്ചു.എട്ടര രൂപയുടെ ഉഴുന്നുവടയ്ക്കും പരിപ്പുവടയ്ക്കും ഇനി 15 രൂപ നല്കണം. 2 വടയ്ക്കു 30 രൂപ. ആലു ബോണ്ട, കച്ചോരി, സമൂസ എന്നിവയ്ക്കു 2 എണ്ണത്തിന് 20 രൂപ എന്നിങ്ങനെയാണ് വര്ധിപ്പിച്ചിരിക്കുന്നത്.
മാത്രമല്ല ബ്രേക്കഫാസ്റ്റ് ഭക്ഷണമായ രണ്ട് ഇഡലിക്കൊപ്പം 30 ഗ്രാം വീതമുളള രണ്ട് ഉഴുന്നുവട നിര്ബന്ധമായി വാങ്ങണമെന്നും പുതിയ പാക്കേജിലുണ്ട്. മൂന്നാമതൊരു ഇഡലി വേണമെങ്കില് വീണ്ടും ഇതേ കോംബോ 35 രൂപ കൊടുത്തു വാങ്ങേണ്ടിവരുും. ഇന്ത്യന് റെയില്വേ കേറ്ററിങ് ആന്ഡ് ടൂറിസം കോര്പറേഷനാണു (ഐആര്സിടിസി) മെനു പരിഷ്കരിച്ചു നിരക്കുകള് കൂട്ടിയത്.കേട്ടുകേള്വിയില്ലാത്ത പാക്കേജുകളിലൂടെ നിര്ബന്ധിച്ച് ഭക്ഷണ സാധനങ്ങള് വലിയ വിലയില് അടിച്ചേല്പ്പിക്കുന്നത് വലിയ വിമര്ശനത്തിന് ഇടയാക്കിയിട്ടുണ്ട്.
0 Comments